- Este vindeiro xoves 6 ás 10h terá lugar no Tribunal Superior de Xustiza de Galicia en A Coruña o xuízo correspondente ao conflito formulado por CNT por discriminación por razón de sexo no Consorcio Galego de Servizos de Igualdade e Benestar.
- Por volta das 9:30h, antes do xuízo, realizaremos unha concentración de protesta ás portas do xulgado. A continuación da protesta, entraremos para asistir como público ao xuízo.
Este conflito susténtase na especial problemática de discriminación indirecta por razón de sexo que sesga a situación de temporalidade do servizo, pois afecta a unha porcentaxe superior ao 90% de mulleres, o que supón unha porcentaxe moi superior á temporalidade na Xunta de Galicia, que se sitúa nun 70% de mulleres e un 30% de homes.
A práctica discriminatoria que denuncia a CNT tería sido levada a cabo polo Consorcio aplicando criterios arbitrarios e aparentemente neutrais que xerarían un efecto adverso sobre as mulleres. En concreto, desde a central anarcosindicalista deféndese que a convocatoria a través de contratación temporal no ano 2007 de toda a estrutura do Consorcio (excepto casualmente as prazas de dirección, para as que se ofrecían contratos fixos) “supuxo un agravio para as mulleres, que son o 90% do persoal, xa que accederon a un emprego precario, as súas condicións de traballo son temporais en lugar de ser estables, afecta á súa protección fronte ao despedimento e poden ser cesadas pola cobertura das prazas as que accederon por concurso-oposición por persoas que só teñen que acreditar méritos, dos que o 70% corresponde a antigüidade (sendo que o CGSIB dótase de persoal en 2007)”.
Desde a CNT recálcase o especial abandono que están sufrindo as mulleres do Consorcio e recórdase que aínda que se enviou unha petición ás vicepresidentas da Comisión para a Igualdade do Parlamento de Galicia para tratar este asunto, Olalla Rodil Fernández (BNG), e Susana Díaz Varela (PSOE), estas nin sequera se dignaron contestar.
ÚNETE! LOITA! DEFÉNDETE! Xuntas somos máis fortes!!
