- A mostra poderá visitarse dende o 30 de maio ao 24 de xuño no claustro da Facultade de Xeografía e Historia de Santiago de Compostela, e despois viaxará a Allariz
A CNT Galiza quere achegar esta importante exposición que xa leva catro anos xirando por todo o Estado con grande éxito. A inauguración terá lugar o día 30 de maio en Compostela ás 19:00h no Claustro da Facultade de Xeografía e Historia da USC, cunha presetación a cargo de Violeta Pérez. A exposición permancerá en Compostela ata o 24 de xuño. Despois trasládase a Allariz.
Sonia Lojo , historiadora na Fundación Anselmo Lorenzo, arquivo histórico da CNT, é a comisaria desta homenaxe á agrupación libertaria dos anos 30. Mulleres que reivindicaron consignas tan actuais como a liberdade sexual, a conciliación laboral, a sororidade e o mesmo salario para homes e mulleres.
A historia das mulleres é un feito silenciado por iso esta exposición trata de recuperar a obra e labor dun grupo de mulleres que nace nos meses previos da guerra civil cunha tripla finalidade, emancipar da tripla escravitude á que se atopa sometida a muller como produtora, como muller e como obxecto.
Mujeres Libres nace cunha función cultural e orientadora debido ás altas taxas de analfabetismo feminino onde tentará formar á muller e elevar a súa situación social a través da formación e orientación ás ideas libertarias como forma de conseguir unha igualdade real a través dunha transformación económica, política e social que promulga o anarquismo.
Coas circunstancias de guerra, mmll orientará as actividades das mulleres para gañar a guerra e asentar a revolución en marcha para alcanzar a igualdade real para todos os seres humanos nunha sociedade mais xusta e igualitaria.
Transcurridas oito décadas dende a creación desta organización feminina a Fundación Anselmo Lorenzo trata de dar a estas mulleres o recoñecemento que perecen, para que a súa loita sirva de experiencia e aprendizaxe ao movemento feminista actual.
A mostra está composta por 16 paneis, ademais de materiais sonoros e audiovisuais, con información sobre a xestación e desenvolvemento da organización, as súas reivindicacións e ámbitos de actuación, as súas formulacións sobre igualdade, educación, traballo, sexualidade e a participación activa que desenvolveu para gañar a guerra contra o fascismo.
A día de hoxe, o avanzado das súas formulacións e accións segue sendo un referente no que vernos reflectidas, sendo noso deber manter ese legado para que sirva como base da loita das mulleres pola consecución da igualdade real.
